Lo projècte « Vèrd Paradís » nasquèt en 2019 dins lo cap de dos professors, un d’SVT, Joan-Luc Bosquet et la professora d’occitan, Magali Fraisse de la ciutat escolària Clemenceau a Montpelhièr

Foguèt jostengut de cap en cima per la referenta cultura de l’establiment Patricia Piovi. Al moment de la refòrma del bachilierat JL Bosquet abandonèt lo projècte en signe de protestacion.
Es un projècte pasmens interdisciplinari que recampèt la dòna André, professora de SVT que s’encarguèt de nomenar la flòra josterranèa del parque, lo sénher Mas, professor de latin al collègi e la dòna Fraisse en occitan. La tòca n’es de nomenar las especias vegetalas del parque de la ciutat escolària dins las lengas istoricas d’aqueste luòc: lo latin, l’occitan e lo francés.
Es un projècte federator que i trabalhèron totas las classas d’occitan del collègi e del licèu: las opcions facultativas, la 2nda OC (classa que l’occitan i es ensenhat en cors de lenga mas tanben en DNL, disciplini non linguistica per lo sénher Labedan en SES, sciéncias economicas e socialas) e los liceans marcats en especialitat « Lenga, literatura e cultura regionalas ». Trabalhèron amb l’ajuda de Clara Torreilles, agregada de letras classicas, anciana IPR d’occitan. Foguèt la classa de 5ena de latin que s’encarguèt de la partida latin. De notar que fargant aqueles panels de senhalisacion de las plantas, los escolans desenvolopèron de competéncias diversas: pintura, utilizacion de las aisinas numericas, lengas romanas, istòria, geografia, sens estetic …  D’efiech, totas las fòtos qu’apareisson suls panels foguèron presas dins lo parque pels escolans que s’inicièron a las tecnicas de presa de vista, de lutz,  de cadratge, dins una emulacion que fasiá plaser de veire.
Aqueste projècte es un omenatge a l’òbra de l’escrivan montpelherenc Max Roqueta, que la sala d’occitan de la ciutat escolària ne pòrta lo nom. Permetèt de descobrir la plaça màger de la natura dins l’òbra «  Vèrd Paradís ». Om espèra qu’aqueste trabalh permetrà a totes los escolans de la ciutat escolària d’agachar autrament son environa e de ne sentir la romanitat …
Dissabte 12 de febrièr de 2022, a miègjorn, lo percors vegetal constituit de 16 panels  foguèt inaugurat per la Provisora Le Bolloch a l’escasença de la jornada « pòrtas dubèrtas» del licèu Clemenceau.

Talher pintura amb los agents del licèu qu’an bastit los panels supòrts …
Visita de l’òrt de las plantas de Montpelhièr amb los escolans de l’EDS LLCR  …
Tornar d’en cò del serralhièr que realizèt l’impression, amb las Terminalas opcion facultativa …